Policia publikon broshura digjitale për hyrjen dhe qëndrimin e të huajve në Kosovë

Policia e Kosovës ka njoftuar se ka publikuar broshura informuese digjitale për qytetarët e Republikës së Kosovës dhe për shtetasit e huaj që ndodhen apo planifikojnë të vizitojnë vendin.

Broshurat përmbajnë udhëzime të detajuara mbi rregullat e hyrjes, lëvizjes, qëndrimit dhe punësimit të të huajve në përputhje me Ligjin për të huajt.

Qëllimi i tyre është t’u ofrojnë publikut informacion të qartë dhe të saktë mbi procedurat ligjore dhe mundësitë e punësimit në territorin e Kosovës.

Materialet janë të qasshme përmes faqes zyrtare të Policisë së Kosovës dhe rrjeteve sociale të institucionit.

Policia ka ftuar qytetarët dhe vizitorët e huaj që t’i konsultojnë këto udhëzues, për të siguruar informim të drejtë dhe respektim të rregullave ligjore gjatë qëndrimit në vend.